თქვენო მაღალყოვლადუსამღვდელოესობავ,
ძვირფასო მეუფე ანანია!
გულითადად გილოცავთ 70 წლის იუბილეს!
თქვენ თითქმის ორმოცი წელია მღვდელმთავრის ხარისხში მსახურობთ და ამ წლების განმავლობაში დიდი ღვაწლი დასდეთ საქართველოს მართლმადიდებელ ეკლესიას.
ჩამოთვლაც კი რთულია ყველა იმ ღირსშესანიშნავი მოვლენისა, რომელიც ჩვენი ეკლესიის ცხოვრების აღმავლობის პერიოდში უშუალოდ თქვენს სახელს უკავშირდება.
აღსანიშნავია თქვენი სამღვდელმთავრო მსახურების განსაკუთრებული ნაყოფიერება ეპარქიებში, რომლებიც საქართველოს კათოლიკოს-პატრიარქ ილია II-ის მხარდამხარ, ფაქტიურად არაფრიდან აღადგინეთ.
ისტორიაში მნიშვნელოვან ადგილს დაიკავებს თქვენი მოღვაწეობა ახალციხისა და სამცხე-ჯავახეთის ეპარქიაში; მიტოვებულ ტაძრებსა თუ მონასტრებში აღდგენილი მსახურებები, ასევე თქვენი დაუღალავი შრომის შედეგად თეთრიწყაროს, მანგლისისა და წალკის რაიონებში ამოქმედებული მრავალი ეკლესია, ხელდასხმული სამღვდელოება.
არანაკლებ მნიშვნელოვანია თქვენი მრავალწლიანი პედაგოგიური მოღვაწეობა, როგორც სასულიერო აკადემიაში, ასევე, კათოლიკოს-პატრიარქის კურთხევითა და თქვენი დიდი შრომით, ტექნიკურ უნივერსიტეტში გახსნილ თეოლოგიის სასწავლო-სამეცნიერო ცენტრში.
საგანმანათლებლო საქმიანობისადმი თქვენს ერთგულებაზე მეტყველებს ასევე 1990 წელს ახალციხის სასულიერო სასწავლებლის ამოქმედების ფაქტი, რაც იმ დროისათვის ძალზედ მნიშვნელოვანი და რთული საქმე იყო.
თქვენი მოღვაწეობის განსაკუთრებულ მხარეს კი, უდავოდ, ნაყოფიერი სამეცნიერო მოღვაწეობა წარმოადგენს, რომელსაც საქართველოს ეკლესიის ისტორიის კვლევაში ძალზედ მნიშვნელოვანი ადგილი უკავია.
როგორც სენაკისა და ჩხოროწყუს მიტროპოლიტმა მინდა განსაკუთრებით აღვნიშნო ის ფაქტი, რომ თქვენი სულიერი მოძღვარი იყო XX საუკუნის ქართული მონაზვნობის შესანიშნავი წარმომადგენელი, ქ. სენაკში, თეკლათის დედათა მონასტერში მოღვაწე არქიმანდრიტი კონსტანტინე (ქვარაია), რომელმაც დიდი გავლენა იქონია თქვენს სულიერ ჩამოყალიბებაზე.
გისურვებთ მრავალჟამიერ ღვთის შეწევნასა და სულიერ სიმტკიცეს!
ქრისტესმიერი სიყვარულით საქართველოს კათოლიკოს-პატრიარქის ტახტის მოსაყდრე, სენაკისა და ჩხოროწყუს მიტროპოლიტი შიო მუჯირი
მილოცვა ამოღებულია წიგნიდან „saqarTvelos samociqulo marTlmadidebeli eklesiis istoriis mematiane“. 2019