კონფერენცია საქართველოს ტექნიკური უნივერსიტეტის რექტორმა, პროფესორმა დავით გურგენიძემ გახსნა. რექტორმა მადლობა გადაუხადა იმ მეცნიერებსა და საზოგადო მოღვაწეებს, რომლებმაც სრულიად საქართველოს კათალიკოს-პატრიარქის, უწმინდესისა და უნეტარესის, ილია II-ის ლოცვა-კურთხევით, საქართველოს ტექნიკურ უნივერსიტეტში თეოლოგიის საუნივერსიტეტო სამეცნიერო ცენტრის დაარსებისთვის იღვაწეს. პროფესორმა დავით გურგენიძემ, ასევე, ისაუბრა სტუ-ის თეოლოგიის ცენტრის ხელმძღვანელის, მანგლისისა და თეთრიწყაროს ეპარქიის მიტროპოლიტის, სტუ-ის პროფესორის, მეუფე ანანია ჯაფარიძისა და ცენტრის თანამშრომლების მიერ გაწეული მოცულობითი სამუშაოს მნიშვნელობის შესახებ.
„დღეს საქართველოს ტექნიკური უნივერსიტეტის ისტორიაში უმნიშვნელოვანესი დღეა. 20 წლის წინ, 2002 წელს, უნივერსიტეტში დაარსდა თეოლოგიის სამეცნიერო ცენტრი, რომლის სულისჩამდგმელი, უწმინდესისა და უნეტარესის ლოცვა-კურთხევით, მეუფე ანანიასთან ერთად, აკადემიკოსი რამაზ ხუროძეა. მადლობა მათ ამ მეტად საჭირო სულიერების სამეცნიერო ცენტრის ჩამოყალიბებისათვის. საქართველოს ტექნიკური უნივერსიტეტისთვის ეს იყო მოვლენა, ახალი სიტყვა, ახალი ნაბიჯი თეოლოგიური მეცნიერების მიმართულებით და ამ უფლების მოპოვება იყო, როგორც დიდი პატივი, ასევე, დიდი შრომის შედეგი. თეოლოგიის ცენტრი 20 წელია წარმატებით ფუნქციონირებს: მოქმედებს როგორც სამაგისტრო, ასევე სადოქტორო პროგრამები და ეკლესიოლოგიაში საკვლევ თემებზე ნაყოფიერი სამეცნიერო მუშაობა მიმდინარეობს. უნივერსიტეტი არის ადგილი, სადაც სტუდენტი უნდა ჩამოყალიბდეს არა მხოლოდ პროფესიონალ სპეციალისტად, არამედ მოქალაქედ და საზოგადოების სრულფასოვან წევრად, რაშიც დიდი წვლილი სწორედაც რომ სულიერებას მიუძღვის. თეოლოგიის საერთაშორისო სამეცნიერო კონფერენციის მუშაობაში მონაწილეობენ, როგორც სასულიერო, ასევე საერო პირები, მეცნიერები, ახალგაზრდა მკვლევრები. სწორედ ამგვარი ერთობაა მნიშვნელოვანი: განათლება, სულიერება, მეცნიერება. სასიხარულოა, რომ ამ ერთობაში საქართველოს ტექნიკურ უნივერსიტეტს თავისი წვლილი შეაქვს. აუცილებლად უნდა აღინიშნოს ის ფაქტიც, რომ კონფერენციის საპატიო სტუმარმა, ათონის მთის ადმინისტრაციულ ცენტრ კარიესში, წმინდა ნიკოლოზის კელიაში მოღვაწე იერომონაზონმა კირილოსმა უნივერსიტეტში წმინდა გიორგის წმინდა ნაწილი შემოაბრძანა, რაც ჩვენი ასწლოვანი უნივერსიტეტის ისტორიაში ღირსსახსოვარ მოვლენად დარჩება“, – განაცხადა დავით გურგენიძემ.
დამსწრე საზოგადოებას მიესალმნენ მანგლისისა და თეთრიწყაროს ეპარქიის მიტროპოლიტი, სტუ-ის თეოლოგიის სამეცნიერო ცენტრის ხელმძღვანელი, პროფესორი, მეუფე ანანია (ჯაფარიძე), საქართველოს მეცნიერებათა ეროვნული აკადემიის პრეზიდენტი, აკადემიკოსი გიორგი კვესიტაძე, მეცნიერებათა ეროვნული აკადემიის აკადემიკოს-მდივანი, აკადემიკოსი რამაზ ხუროძე, იერომონაზონი კირილოსი, ბოლნისის ეპარქიის მთავარეპისკოპოსი ეფრემი (გამრეკელიძე) და სხვა მიწვეული სტუმრები.
მეუფე ანანიამ საქართველოს ტექნიკური უნივერსიტეტსა და მის რექტორს, პროფესორ დავით გურგენიძეს მადლობა გადაუხადა იმ სიახლეთა დანერგვისთვის, რასაც უნივერსიტეტში ბოლო სამი წლის განმავლობაში აქვს ადგილი, ასევე, მადლიერებით აღნიშნა აკადემიკოს რამაზ ხუროძის, როგორც სტუ-ის იმჟამინდელი რექტორის წვლილი და მხარდაჭერა თეოლოგიის საუნივერსიტეტო სამეცნიერო ცენტრის დაარსების საქმეში.
„20 წლის წინ, საქართველოს ტექნიკურ უნივერსიტეტში თეოლოგიის საუნივერსიტეტო სამეცნიერო ცენტრის დაარსებას რთული წინაპირობა უძღოდა. თანამედროვე საქართველო, ფაქტობრივად, იმ დროს იწყებდა ჩამოყალიბებას. ხალხი ახალი გამოსული იყო ათეიზმიდან, თუმცა, ამავდროულად, ათასგვარმა სექტამ დაიწყო ფეხის მოკიდება. საჭირო იყო ახალგაზრდებთან ახლოს ყოფნა და ამ დროს პატრიარქის თანადგომით, რამაზ ხუროძემ, მაშინდელმა რექტორმა, საქართველოს ტექნიკურ უნივერსიტეტში თეოლოგიის ცენტრი გასხნა. პატრიარქი არაერთხელ ეწვია უნივერსიტეტს და თავის ეპისტოლეებში ასახა თეოლოგიის საუნივერსიტეტო ცენტრის მთავარი მიზანი. დღეს, საქართველოს ტექნიკური უნივერსიტეტი და მისი რექტორი დავით გურგენიძე მრავალმხრივ უწყობს ხელს ცენტრს, განახორციელოს ნაყოფიერი სამეცნიერო-კვლევითი მუშაობა, გამოსცეს ახალი ნაშრომები და ამით გაამდიდროს თეოლოგიის სამეცნიერო ლიტერატურა. თეოლოგიის ცენტრმა შეისწავლა საქართველოს საეკლესიო სამართალი, მოიძია და დაამუშავა არაერთი იშვიათი დოკუმენტი, სამეცნიერო ძიებებში ჩართულნი არიან ახალგაზრდა მკვლევრები, მაგისტრანტები, დოქტორანტები და ეს მოცულობითი სამუშაო უნივერსიტეტის მხარდაჭერით ხორციელდება. მადლობა საქართველოს ტექნიკურ უნივერსიტეტს ამ ხელშეწყობისთვის“, – აღნიშნა მეუფე ანანიამ.
წმინდა გიორგის წმინდა ნაწილი, რომელიც ბერძენმა იეორომონაზონმა კირილოსმა ათონის მთიდან ჩამოაბრძანა, თეოლოგიის საუნივერსიტეტო სამეცნიერო ცენტრის სამლოცველოში დაასვენეს, სადაც ბოლნისის ეპარქიის მთავარეპისკოპოსმა ეფრემმა, ქართველ და უცხოელ მღვდელთმთავრებთან ერთად, ლოცვა აღავლინა. საეკლესიო საგალობლები სტუ-ის ვაჟთა სახალხო კაპელასთან არსებულმა სტუდენტთა ვოკალური ანსამბლის წევრებმა შეასრულეს.
ღონისძიების გახსნის ოფიციალური ნაწილის დასრულების შემდეგ, საერთაშორისო კონფერენციის მუშაობა სექციებად დაიყო. განსახილველად წარმოდგენილი იყო, როგორც თეოლოგიის ცნობილ მკვლევართა, ასევე სტუ-ის თეოლოგიის სამეცნიერო ცენტრის დოქტორანტთა და მაგისტრანტთა ნაშრომები.