სრულიად საქართველოს კათოლიკოს-პატრიარქ ილია II-ის ლოცვა-კურთხევით, მიტროპოლიტი ანანია იმ დროს დაადგა მღვდელმსახურების რთულ და მძიმე გზას, როდესაც ათეისტურ სახელმწიფოში ეს ერთეული რჩეული ადამიანების დიდი გამბედაობისა და თავდადების მაგალითი იყო. სადაც არ უნდა ეღვაწა მიტროპოლიტ ანანიას, სამცხე-ჯავახეთის თუ მანგლის-თეთრიწყაროს ეპარქიებში, ყველგან ერთგულად ემსახურებოდა ღმერთს, სამშობლოს, დედაეკლესიას. მიტროპოლიტი ანანია ჯაფარიძე მთელი ცხოვრების მანძილზე ღრმად და სრულყოფილად სწავლობს ქართული სამოციქულო მართლმადიდებელი ეკლესიის ისტორიას. საქართველოს ეკლესიის მრავალი აქტუალური პრობლემა მის ოთხტომულში სწორედ ეკლესიის ისტორიისა და კანონიკური სამართლის, ასევე ეკლესიური მსოფლმხედველობისა და სწავლების გათვალისწინებით არის ასახული. მეუფე ანანიას წიგნებში არგუმენტირებული პასუხი არის გაცემული ყველა იმ ცრუ ისტორიოგრაფიულ ოპუსზე, რომელსაც გაცნობიერებულად თუ გაუცნობიერებლად ავრცელებენ საქართველოს ისტორიის გამყალბებლები. სრულიად საქართველოს კათოლიკოს-პატრიარქის – ილია II-ის ლოცვა-კურთხევით შექმნილი რეალური ისტორიის დამდგენი მუდმივმოქმედი კომისია მეუფე ანანიას ხელმძღვანელობით ყველაფერს აკეთებს იმისათვის, რომ კომუნისტური რეჟიმის დროს მიჩქმალული ისტორიული 24 ფაქტები გაცხადდეს და ჩვენი საზოგადოებისთვის ხელმისაწვდომი გახდეს. მის მიერვე დაარსებული რამდენიმე სერიის ფარგლებში მიტროპოლიტი სწავლობს საქართველოს ეკლესიის კონკრეტულ წყაროებს და თვალნათლივ აჩვენებს, რომ ქვეყნის ისტორია ყოველთვის დიდწილად იყო დამოკიდებული ეკლესიის სიძლიერეზე. თითქმის არ დარჩენილა საკითხი საქართველოს ეკლესიის ისტორიის კუთხით, რომლის შესახებაც მეუფე ანანიას თავისი კომპეტენტური სიტყვა არ ეთქვას. ორ ათეულ წელზე მეტია მეუფე ანანია თბილისის სასულიერო აკადემიაში პედაგოგიურ მოღვაწეობას ეწევა _ სტუდენტებს გადასცემს ცოდნას საქართველოს სამოციქულო მართლმადიდებელი ეკლესიის ისტორიის უმნიშვნელოვანეს საკითხებთან დაკავშირებით. მიტროპოლიტი ანანია არაერთხელ გამოსულა საჯაროდ ეკლესიისა და სასულიერო აკადემიის ავტორიტეტის დასაცავად. თბილისის სასულიერო აკადემიისა და სემინარიის სახელით, დიდი სიყვარულითა და პატივისცემით ვულოცავთ მანგლელ მიტროპოლიტს, მეუფე ანანია ჯაფარიძეს, საიუბილეო თარიღს და ვუსურვებთ ხანგრძლივ სიცოცხლესა და ახალ წარმატებებს თავის სამღვდელთმთავრო საქმიანობაში. თბილისის სასულიერო აკადემიისა და სემინარიის რექტორი, თეოლოგიისა და ფილოლოგიის დოქტორი, პროფესორი, პროტოპრესვიტერი გიორგი ზვიადაძე
saqarTvelos samociqulo marTlmadidebeli eklesiis istoriis mematiane. 2019