სატელევიზიო პროექტი, პირობითი სახელწოდებით “ქართული ენა _ ჩვენი სახლი”
გადაცემის სახელწოდება უკავშირდება ჰაიდეგერის ცნობილ ფრაზას _ “ენა ყოფიერების სახლია”. გადაცემის კონცეფცია უმთავრესად ემყარება არა ქართული ენის სამეცნიერო ასპექტებს, არამედ მისი, როგორც ჩვენი ქვეყნის მოქალაქეების კომუნიკაციიისა და ინტეგრაციის ფუნქციას; თანამედროვე ყოფის, სულიერების, განათლების, მეცნიერების, კულტურის, საქმიანი ურთიერთობების სხვადასხვა სფეროში ენის ადეკვატური გამოყენების, განვითარებისა თუ პირიქით _ რეგრესის ასპექტებს.
კონცეფცია გულისხმობს მინიმუმ სამი ძირითადი მიმართულების მოცვას:
• ქართული ენის როლი საქართველოს მრავალეროვანი და მრავალენოვანი მოსახლეობის სამოქალაქო იდენტობისა და ინტეგრაციის პროცესში;
• გლობალიზაციისა და საყოველთაო მასკულტურიზაციის პროცესში ენობრივი სამეტყველო ქსოვილის, კონკრეტული სფეროებისა და დარგების ენობრივი ცნებითი სისტემის განვითარების პრობლემები;
• რეფორმირებული განათლების სისტემის (პირველ ყოვლისა, ეროვნული გამოცდების) მოთხოვნებთან მოსწავლე ახალგაზრდობის მომზადების შესაბამისობა (პირველ რიგში ვგულისხმობთ იმ კრიტერიუმებს, რომელთა მიხედვითაც თუნდაც ზოგადი უნარების საგამოცდო პროგრამა ითვალისწინებს ქართული ენის ღრმა ცოდნასა და მრავალფუნქციურ გააზრებას).
პროექტის მონაწილეთა და მხარდამჭერთა არეალში ბუნებრივად ექცევა: საქართველოს საპატრიარქოს ქართული ენისა და კულტურის სამეცნიერო საბჭო, საქართველოს პარლამენტის ეროვნულ უმცირესობებთან მუშაობის კომიტეტი, პარლამენტის ეროვნული ბიბლიოთეკა, საქართველოს მეცნიერებათა აკადემიის ინსტიტუტები, განათლებისა და კულტურის სამინისტროები, უმაღლესი სასწავლებლები, სკოლები, მედიასაშუალებები და ა.შ.
პროექტის განხორციელება წარმოგვიდგენია საზოგადოებრივ-შემეცნებითი თოქ-შოუს ფორმატში, რომლის თითოეული გადაცემა აიგება, ერთი მხრივ, ენობრივ პრობლემებთან საქართველოში მცხოვრები კონკრეტული ეთნოსების მიმართების მიხედვით; მეორე მხრივ, ქართული ენის საკომუნიკაციო ფუნქციაზე _ სოციალური სტრუქტურების, ცალკეული დარგებისა (ვთქვათ _ საინფორმაციო ტექნოლოგიები, ეკონომიკა, ბიზნესი, მედიაკომუნიკაციები და ა.შ.) და ყოფის პრაქტიკაში.
გადაცემის კონცეპტუალური და სანახაობრივი მხარის წარმატებით შეხამების შემთხვევაში მას, შესაძლოა, მოჰყვეს იმგვარი ინტერაქტიურობა, რომლის კარგი პრეცენდენტი შექმნა I არხის ეთერში პროექტმა “დიდი ათეული” და რომლის ნიშაც ამჯერად გამოთავისუფლებულია.
ტელეეთერის პარალელურად, შესაძლებელია პროექტის რეალიზება “საზოგადოებრივი რადიოს” ეთერშიც, პირდაპირი ეთერის რეჟიმში, რაც გაზრდის გადაცემაში მსმენელის ინტერაქტიურ ჩართულობას და განაპირობებს გადაცემის ბიუჯეტის ოპტიმალურობას.
კონცეფციის მხარდაჭერის შემთხვევაში წარმოგიდგენთ პროექტის კონკრეტული ფორმატის აღწერასა და ბიუჯეტს.
პროქტის საინიციატივო ჯგუფი